“LISON UT-TAYR”DAGI VOQEALAR SAHNAGA KO‘CHDI

 Asar O‘zbekiston Respublikasida xizmat ko‘rsatgan artist Shamurat Yusupov tomonidan sahnalashtirilgan.

Premyera

 Viloyat qo‘g‘irchoq teatrida Alisher Navoiyning “Lison ut-tayr” asari asosida Hayitmat Rasul tomonidan yozilgan “Qush tili” insenirovkasining premyerasi bo‘lib o‘tdi.

 Ma’lumki, Alisher Navoiy o‘zining “Lison ut-tayr” dostonida qushlar timsolida tasavvuf yo‘liga kirgan va Allohni ko‘rishga, haqqa yetishishga astoydil kirishgan xudojo‘y insonlarni tasvirlashga intilgan. Qushlarning rang-barang timsollari orqali Alisher Navoiy o‘zining tasavvuf ta’limoti bilan bog‘liq g‘oyalarini, Allohning hamma narsaning tashqarisida emas, balki ichida, o‘zida ekanini ko‘rsatish va isbotlashga harakat qiladi.

Rejissor insenirovkani sahnalashtirish jarayonida ham qo‘g‘irchoq teatrning planshet uslubidan foydalanib, asardagi voqea-hodisalarni mazmundan chekinmagan holda 3 pardada namoyon etadi. Birinchi pardada qushlar o‘zaro kelishmay qolsa, ikkinchi pardadagi voqealar orqali o‘zlarini topishga harakat qiladi va bunda o‘z vujudlaridagi yomon illatlarga ro‘baro‘ keladi. So‘nggi, ya’ni 3-pardada esa ular o‘zliklarini aynan o‘z jismlaridan topadi. YA’ni, Navoiy aytganidek, neki istasa o‘z qalblarida mo‘jassam ekanining shohidi bo‘ladi.

Insenirovkani tomosha qilish jarayonida bu hislatlar tomoshabinga ham ko‘chadi. Qalblarida oniy vaqtlarda joylashib olgan “Kasofat” deb nomlanuvchi salbiy qush obrazi, o‘zlaridagi salbiy illat bilan kurashadi. Sabr qanoat va ezgu fikr natijasida bu iblis illat ustidan g‘alaba qozonadilar.