Navoiy viloyati qo‘g‘irchoq teatri Qashqadaryoga gastrol safar bilan tashrif buyurdi.

Qashqadaryo viloyati qo‘g‘irchoq teatri jamoasi Navoiy viloyati qo‘g‘irchoq teatrining bir guruh ijodkorlarini yuksak hurmat va samimiyat ila tantanali tarzda kutib oldi. San’at ahlining bu uchrashuvi nafaqat oddiy tashrif, balki ijodiy ruhlar tutashgan, qalblarni yaqinlashtirgan unutilmas voqeaga aylandi. Mazkur tashrif O‘zbekiston Respublikasi Prezidentining 406-son qarori ijrosini ta’minlash, shu bilan birga hududlar o‘rtasidagi madaniy aloqalarni yanada mustahkamlash, san’at orqali do‘stlik va hamjihatlik rishtalarini mustahkamlash maqsadida tashkil etildi.

Gastrol safari davomida ijodkorlar Qarshi shahridagi bir nechta maktabgacha ta’lim muassasalarida o‘zining rang-barang va mazmunli spektakllarini namoyish etdilar. Mitti tomoshabinlar uchun sahnalashtirilgan ushbu chiqishlar bolajonlarga quvonch ulashib, ularning qalbida ezgulik, mehr-oqibat va go‘zallikka muhabbat tuyg‘ularini uyg‘otdi. Har bir sahna asari bolalar uchun haqiqiy bayramga aylanib, uzoq vaqt esda qoladigan yorqin taassurotlar qoldirdi.